tasir ki tarah kabhi tabir ki tarah

tāsīr kī tarah kabhī ta.abīr kī tarah

tum mil ga.e mujhe mirī taqdīr kī tarah

is shahr-e-dil pe aap kā qabza rahe sadā

āzād ho na pā.ūñ maiñ kashmīr kī tarah

maiñ ne zamāne-bhar ke luTeroñ kī aañkh se

tum ko chhupā ke rakkhā hai jāgīr kī tarah

tere laboñ ko dekh ke suntā huuñ maiñ tujhe

terā sukūt hotā hai taqrīr kī tarah

tū jāntā nahīñ hai vo chup-chāp aadmī

muñh meñ zabān rakhtā hai shamshīr kī tarah

chhoḌā nahīñ hai aaj bhī masrūfiyāt ne

itvār lag rahā hai mujhe piir kī tarah

kyā ho sakegā koī tumhārī tarah 'razā'

tum to nahīñ ho apnī hī tasvīr kī tarah

tasir ki tarah kabhi tabir ki tarah

tum mil gae mujhe meri taqdir ki tarah

is shahr-e-dil pe aap ka qabza rahe sada

aazad ho na paun main kashmir ki tarah

main ne zamane-bhar ke luTeron ki aankh se

tum ko chhupa ke rakkha hai jagir ki tarah

tere labon ko dekh ke sunta hun main tujhe

tera sukut hota hai taqrir ki tarah

tu jaanta nahin hai wo chup-chap aadmi

munh mein zaban rakhta hai shamshir ki tarah

chhoDa nahin hai aaj bhi masrufiyat ne

itwar lag raha hai mujhe pir ki tarah

kya ho sakega koi tumhaari tarah 'raza'

tum to nahin ho apni hi taswir ki tarah