tassub ki faza mein tana-e-kirdar kya deta

ta.assub kī fazā meñ ta.ana-e-kirdār kyā detā

munāfiq dostoñ ke haath meñ talvār kyā detā

amīr-e-shahr to ḳhud zard-rū thā ek muddat se

jharoke se vo ahl-e-shahr ko dīdār kyā detā

hamāre din ko jo detā nahīñ ik dhuup kā TukḌā

hamārī raat ko vo chāñd kā me.aar kyā detā

kahīñ golī kahīñ gaalī mohabbat se hai dil ḳhālī

ḳhabar ye thī to bachchoñ ko nayā aḳhbār kyā detā

bahut dushvār hai ḳhuddār rah kar zindagī karnā

ḳhushāmad karne vaalā sadqa-e-dastār kyā detā

ḳhud us kā saaya bhī us se gurezāñ hai musībat meñ

mirā ham-sāya mujh ko sāya-e-dīvār kyā detā

sarā.e-jāñ meñ dānista musāfir luT gayā varna

ki dil sā saḳht-jāñ ik gul-badan ko vaar kyā detā

tassub ki faza mein tana-e-kirdar kya deta

munafiq doston ke hath mein talwar kya deta

amir-e-shahr to KHud zard-ru tha ek muddat se

jharoke se wo ahl-e-shahr ko didar kya deta

hamare din ko jo deta nahin ek dhup ka TukDa

hamari raat ko wo chand ka mear kya deta

kahin goli kahin gali mohabbat se hai dil KHali

KHabar ye thi to bachchon ko naya aKHbar kya deta

bahut dushwar hai KHuddar rah kar zindagi karna

KHushamad karne wala sadqa-e-dastar kya deta

KHud us ka saya bhi us se gurezan hai musibat mein

mera ham-saya mujh ko saya-e-diwar kya deta

sarae-jaan mein danista musafir luT gaya warna

ki dil sa saKHt-jaan ek gul-badan ko war kya deta