tāzgī āriz-e-gul pe hai na ra.anā.ī hai
kaun kahtā hai gulistāñ meñ bahār aa.ī hai
zindagī saare marāhil se guzar aa.ī hai
ab to bas tū hai tirī yaad hai tanhā.ī hai
nīchī nazreñ kiye ḳhāmosh hī dekhā us ko
jis kī tasvīr meñ bhī quvvat-e-goyā.ī hai
tū ki mastūr hai āñkhoñ se ye taslīm magar
zarre zarre se ayaañ kis kī ye ra.anā.ī hai
dekhiye le ke kahāñ jaatī hai ab mauj-e-balā
gahre dariyā se to ye ziist ubhar aa.ī hai
din ke Dhalte hī chalī aatī hai tū paas mire
kitnī monis tū mirī ai shab-e-tanhā.ī hai
dil mirā TuuT gayā hai to ye aalam hai 'sharīf'
naġhme be-kaif haiñ ġhamgīn sī shahnā.ī hai
tazgi aariz-e-gul pe hai na ranai hai
kaun kahta hai gulistan mein bahaar aai hai
zindagi sare marahil se guzar aai hai
ab to bas tu hai teri yaad hai tanhai hai
nichi nazren kiye KHamosh hi dekha us ko
jis ki taswir mein bhi quwwat-e-goyai hai
tu ki mastur hai aankhon se ye taslim magar
zarre zarre se ayan kis ki ye ranai hai
dekhiye le ke kahan jati hai ab mauj-e-bala
gahre dariya se to ye zist ubhar aai hai
din ke Dhalte hi chali aati hai tu pas mere
kitni monis tu meri ai shab-e-tanhai hai
dil mera TuT gaya hai to ye aalam hai 'sharif'
naghme be-kaif hain ghamgin si shahnai hai
Source:
Teesri Aankh (Pg. 65)
-
Author:
Shareef Ahmad Qureshi
-
- Publisher: Shareef Ahmad Qureshi
- Year of Publication: 2017
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.