taziyat ki khokhli hai rasm jari aaj-kal

ta.aziyat kī khokhlī hai rasm jaarī āj-kal

is tarah se ho rahī hai ġham-gusārī āj-kal

log nañge paañv haiñ aur kirchiyāñ haiñ farsh par

aur is par maut kā hai raqs jaarī āj-kal

shauq hai ham ko tamāsha dekhne kā aur yahāñ

rahnumā bhī mil ga.e haiñ kuchh madārī āj-kal

ab nisāb-e-ishq meñ shāmil nahīñ mehr-o-vafā

ho ga.e haiñ ye mazāmīñ iḳhtiyārī āj-kal

jiit par us kā yaqīñ puḳhta huā ye dekh kar

aa rahī hai nafratoñ meñ pā.edārī āj-kal

ye kahā thā maan se vo maan rakhtā hai mirā

ho rahī hai jā-ba-jā par sharmsārī āj-kal

muddatoñ ke ba.ad vo paikar huā hai mehrbāñ

hai magar parhez-gārī ham pe taarī āj-kal

baḳht kyā jaage mire duniyā shanāsā ho ga.ī

sab kī mujh se ho ga.ī hai rishtedārī āj-kal

zindagī kamyāb hone kā ḳhasāra ye bhī hai

qātiloñ meñ baḌh ga.ī be-roz-gārī āj-kal

taziyat ki khokhli hai rasm jari aaj-kal

is tarah se ho rahi hai gham-gusari aaj-kal

log nange panw hain aur kirchiyan hain farsh par

aur is par maut ka hai raqs jari aaj-kal

shauq hai hum ko tamasha dekhne ka aur yahan

rahnuma bhi mil gae hain kuchh madari aaj-kal

ab nisab-e-ishq mein shamil nahin mehr-o-wafa

ho gae hain ye mazamin iKHtiyari aaj-kal

jit par us ka yaqin puKHta hua ye dekh kar

aa rahi hai nafraton mein paedari aaj-kal

ye kaha tha man se wo man rakhta hai mera

ho rahi hai ja-ba-ja par sharmsari aaj-kal

muddaton ke baad wo paikar hua hai mehrban

hai magar parhez-gari hum pe tari aaj-kal

baKHt kya jage mere duniya shanasa ho gai

sab ki mujh se ho gai hai rishtedari aaj-kal

zindagi kamyab hone ka KHasara ye bhi hai

qatilon mein baDh gai be-roz-gari aaj-kal