tabahi raqs karti hai sada jin ke ishaaron par

tabāhī raqs kartī hai sadā jin ke ishāroñ par

unhī kā bāġh-e-ālam meñ tasallut hai bahāroñ par

bulandī raas na aa.e jinheñ vo nīche girte haiñ

yahī nazzāra miltā hai hamesha ābshāroñ par

nasha koī bhī ho kuchh sochiye detā nahīñ ruk kar

baḌā mushkil hai ruk jaanā Dhalānoñ par utāroñ par

vahī paate haiñ gauhar jo utarte haiñ samundar meñ

milegā kyā unheñ jo baiTh jaate haiñ kināroñ par

jo gul hoñ to añdherā ho jo bhaḌkeñ aag lag jaa.e

bharosa kar liyā ham ne kuchh aise hī sharāroñ par

fazā-e-ālam-e-hastī mo.attar hai hamīñ se aaj

hamārā hī sadā se qarz hai aatī bahāroñ par

nahīñ hai ai 'razā' farzāngī kuchh ilm par mauqūf

ki ġhālib aa ga.e dīvāne aksar hoshyāroñ par

tabahi raqs karti hai sada jin ke ishaaron par

unhi ka bagh-e-alam mein tasallut hai bahaaron par

bulandi ras na aae jinhen wo niche girte hain

yahi nazzara milta hai hamesha aabshaaron par

nasha koi bhi ho kuchh sochiye deta nahin ruk kar

baDa mushkil hai ruk jaana Dhalanon par utaron par

wahi pate hain gauhar jo utarte hain samundar mein

milega kya unhen jo baiTh jate hain kinaron par

jo gul hon to andhera ho jo bhaDken aag lag jae

bharosa kar liya hum ne kuchh aise hi shararon par

faza-e-alam-e-hasti moattar hai hamin se aaj

hamara hi sada se qarz hai aati bahaaron par

nahin hai ai 'raza' farzangi kuchh ilm par mauquf

ki ghaalib aa gae diwane aksar hoshyaron par