tabib kahte hain juz wahm-e-KHwab kuchh bhi nahin

tabīb kahte haiñ juz vahm-e-ḳhvāb kuchh bhī nahīñ

to kyā jo ham ne sahe vo azaab kuchh bhī nahīñ

hamārī dasht-navardī tumhāre kaam aa.ī

tumheñ ye kaun batātā sarāb kuchh bhī nahīñ

nazīr us kī maiñ kyā duuñ ki sāmne us ke

charāġh maah sitāra gulāb kuchh bhī nahīñ

tamām umr kiyā maiñ ne kār-e-lā-hāsil

ki mad.h-e-husn-e-butāñ kā savāb kuchh bhī nahīñ

koī latīf sī shai ho to ham piyeñ saaqī

ham ahl-e-dil kī nazar meñ sharāb kuchh bhī nahīñ

agar meñ jazb na kar paañv raushnī 'kāshif'

to maah kuchh bhī nahīñ āftāb kuchh bhī nahīñ

tabib kahte hain juz wahm-e-KHwab kuchh bhi nahin

to kya jo hum ne sahe wo azab kuchh bhi nahin

hamari dasht-nawardi tumhaare kaam aai

tumhein ye kaun batata sarab kuchh bhi nahin

nazir us ki main kya dun ki samne us ke

charagh mah sitara gulab kuchh bhi nahin

tamam umr kiya main ne kar-e-la-hasil

ki madh-e-husn-e-butan ka sawab kuchh bhi nahin

koi latif si shai ho to hum piyen saqi

hum ahl-e-dil ki nazar mein sharab kuchh bhi nahin

agar mein jazb na kar panw raushni 'kashif'

to mah kuchh bhi nahin aaftab kuchh bhi nahin