taDap alam mein nahin hai sukun KHushi mein nahin

taḌap alam meñ nahīñ hai sukūñ ḳhushī meñ nahīñ

bahut dinoñ se koī lutf zindagī meñ nahīñ

agar ye sach hai to lāzim hai ḳhud-farāmoshī

ḳhud-āgahī ke sivā kuchh ḳhud-āgahī meñ nahīñ

jamī huī hai shab-e-hijr-e-āsmāñ pe nazar

tirī jhalak to sitāroñ kī raushnī meñ nahīñ

jo ahl-e-dil ho to mafhūm-e-ḳhāmushī samjho

ye kyā kahā koī mafhūm ḳhāmushī meñ nahīñ

kamāl-e-dard pe nāzāñ haiñ āshiqī vaale

ma.āl-e-dard abhī zehn-e-āshiqī meñ nahīñ

bas ab to un kī nazar yaad aa ga.ī 'shāhid'

jo baat un kī nazar meñ hai shā.irī meñ nahīñ

taDap alam mein nahin hai sukun KHushi mein nahin

bahut dinon se koi lutf zindagi mein nahin

agar ye sach hai to lazim hai KHud-faramoshi

KHud-agahi ke siwa kuchh KHud-agahi mein nahin

jami hui hai shab-e-hijr-e-asman pe nazar

teri jhalak to sitaron ki raushni mein nahin

jo ahl-e-dil ho to mafhum-e-KHamushi samjho

ye kya kaha koi mafhum KHamushi mein nahin

kamal-e-dard pe nazan hain aashiqi wale

maal-e-dard abhi zehn-e-ashiqi mein nahin

bas ab to un ki nazar yaad aa gai 'shahid'

jo baat un ki nazar mein hai shairi mein nahin