taDap ke haal sunaya to aankh bhar aai

taḌap ke haal sunāyā to aañkh bhar aa.ī

jo us ne zaḳhm dikhāyā to aañkh bhar aa.ī

thī jis charāġh se qaa.em mirī umīd-e-sahar

havā ne us ko bujhāyā to aañkh bhar aa.ī

zamāne-bhar kā sitam sah ke muskurātā rahā

fareb apnoñ se khāyā to aañkh bhar aa.ī

hamāre shahr kī galiyoñ meñ qahr Dhāte hue

lahū kā sail dar aayā to aañkh bhar aa.ī

sabā ne aah ḳhizāoñ ke saath mil kar phir

guloñ kā rañg uḌāyā to aañkh bhar aa.ī

jabīn-e-hāl pe maazī kī talḳh yādoñ ne

sunahrā naqsh banāyā to aañkh bhar aa.ī

tamām umr to apnoñ kī Thokaroñ meñ rahe

kisī ne sar pe biThāyā to aañkh bhar aa.ī

bichhaḌte vaqt kisī ne jo pyaar se 'shamsī'

machal ke haath hilāyā to aañkh bhar aa.ī

taDap ke haal sunaya to aankh bhar aai

jo us ne zaKHm dikhaya to aankh bhar aai

thi jis charagh se qaem meri umid-e-sahar

hawa ne us ko bujhaya to aankh bhar aai

zamane-bhar ka sitam sah ke muskuraata raha

fareb apnon se khaya to aankh bhar aai

hamare shahr ki galiyon mein qahr Dhate hue

lahu ka sail dar aaya to aankh bhar aai

saba ne aah KHizaon ke sath mil kar phir

gulon ka rang uDaya to aankh bhar aai

jabin-e-haal pe mazi ki talKH yaadon ne

sunahra naqsh banaya to aankh bhar aai

tamam umr to apnon ki Thokaron mein rahe

kisi ne sar pe biThaya to aankh bhar aai

bichhaDte waqt kisi ne jo pyar se 'shamsi'

machal ke hath hilaya to aankh bhar aai