taDap raha tha main jis dard-e-la-dawa ke liye

taḌap rahā thā maiñ jis dard-e-lā-davā ke liye

vo mil gayā hai magar chhīn le ḳhudā ke liye

maiñ buuñd buuñd Tapaktā huuñ apne hoñToñ par

chalā thā le ke ye sarmāya karbalā ke liye

fishār-e-ġham ne mujhe chuur chuur kar Daalā

kivāḌ khol de saare zarā havā ke liye

kaTī huī hai mire taaza mausamoñ kī zabāñ

kahāñ se lā.ūñgā alfāz ab duā ke liye

mirī talab ne mire haath toḌ Daale haiñ

bahut kaḌā hai ye lamha mirī anā ke liye

kabhī darīche samundar kī samt khulte the

taras gayā huuñ magar ab khulī fazā ke liye

mujhe ḳhabar hai jhukegī tirī nazar na kabhī

banī hai ye to sifat chashm-e-bā-hayā ke liye

har ek chiiz yahāñ kāġhazī libās meñ hai

koī jagah nahīñ miltī gul-e-vafā ke liye

ḳhayāl meñ ka.ī kāñTe utar ga.e 'afzal'

sazā milī hai ye ik harf-e-nā-rasā ke liye

taDap raha tha main jis dard-e-la-dawa ke liye

wo mil gaya hai magar chhin le KHuda ke liye

main bund bund Tapakta hun apne honTon par

chala tha le ke ye sarmaya karbala ke liye

fishaar-e-gham ne mujhe chur chur kar Dala

kiwaD khol de sare zara hawa ke liye

kaTi hui hai mere taza mausamon ki zaban

kahan se launga alfaz ab dua ke liye

meri talab ne mere hath toD Dale hain

bahut kaDa hai ye lamha meri ana ke liye

kabhi dariche samundar ki samt khulte the

taras gaya hun magar ab khuli faza ke liye

mujhe KHabar hai jhukegi teri nazar na kabhi

bani hai ye to sifat chashm-e-ba-haya ke liye

har ek chiz yahan kaghazi libas mein hai

koi jagah nahin milti gul-e-wafa ke liye

KHayal mein kai kanTe utar gae 'afzal'

saza mili hai ye ek harf-e-na-rasa ke liye