tafakkurāt-e-zamāna se ho ke begāne
ye kis ḳhayāl meñ uljhe hue haiñ dīvāne
har ek hañstā hai lekin ye koī kyā jaane
ye ban ga.e ki banā.e ga.e haiñ dīvāne
nigāh-e-ishq meñ shāh-o-gadā barābar haiñ
nigāh-e-ishq koī imtiyāz kyā jaane
kisī ke uThne se suunī na hogī bazm koī
bahār-e-sham.a salāmat hazār parvāne
vahī jahāñ ke nasheb-o-farāz ko samjhe
chale jo rāh-e-mohabbat kī Thokareñ khāne
yahāñ ḳhushī to nahīñ hai magar pa.e taskīñ
ġhamoñ kā naam ḳhushī rakh liyā hai duniyā ne
ye jāntā huuñ ki tai kar rahā huuñ rāh-e-hayāt
kahāñ pe hai mirī manzil use ḳhudā jaane
fanā hai sab ko in ābādiyoñ pe naaz na kar
zabān-e-hāl se ye kah rahe haiñ parvāne
jo apne haath se koī pilā de ai 'shārib'
us ek jaam pe sadqe hazār paimāne
tafakkuraat-e-zamana se ho ke begane
ye kis KHayal mein uljhe hue hain diwane
har ek hansta hai lekin ye koi kya jaane
ye ban gae ki banae gae hain diwane
nigah-e-ishq mein shah-o-gada barabar hain
nigah-e-ishq koi imtiyaz kya jaane
kisi ke uThne se suni na hogi bazm koi
bahaar-e-shama salamat hazar parwane
wahi jahan ke nasheb-o-faraaz ko samjhe
chale jo rah-e-mohabbat ki Thokaren khane
yahan KHushi to nahin hai magar pae taskin
ghamon ka nam KHushi rakh liya hai duniya ne
ye jaanta hun ki tai kar raha hun rah-e-hayat
kahan pe hai meri manzil use KHuda jaane
fana hai sab ko in aabaadiyon pe naz na kar
zaban-e-haal se ye kah rahe hain parwane
jo apne hath se koi pila de ai 'shaarib'
us ek jam pe sadqe hazar paimane
Source:
Firdaus-e-Nazar (Pg. 12)
-
Author:
Sultan Haider Khan
-
- Publisher: Urdu Acadami U.P
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.