taghaful par bhi un se dil ko ek wabastagi hogi

taġhāful par bhī un se dil ko ik vābastagī hogī

mohabbat ne mohabbat kī nazar pahchān lī hogī

mirī jānib kisī din be-irāda uTh ga.ī hogī

nigāh-e-nāz ko phir bhī bahut zahmat huī hogī

ye 'ādat hai hasīnoñ kī to is 'ādat ko kyā kahiye

ki jis se dostī hogī usī se dushmanī hogī

vahāñ bhī kashmakash paa.ī vahī saudāgarī dekhī

maiñ samjhā thā ki maiḳhāne meñ duniyā dūsrī hogī

sitāre chāñd sūraj sham' sab ko aazmā dekhā

vo jab tashrīf lā.eñge to ghar meñ raushnī hogī

bahār aane to do tum dekh lenā ai chaman vaalo

mirī dīvāngī meñ bhī baḌī shā.istagī hogī

abhī un se ta'alluq hai nigāhoñ se nigāhoñ tak

kabhī vo muskurā.eñge kisī din baat bhī hogī

jahāñ Thahrā huā sā hai fazā badlī huī sī hai

mire saaqī ne paimāne kī gardish rok dī hogī

jahāñ pahle nasheman thā vahāñ ab phūl-patte haiñ

magar āsār kahte haiñ yahāñ bijlī girī hogī

ye rāz-e-mai-kada sab ko nahīñ mā'lūm ai 'māhir'

tavajjoh chashm-e-sāqī kī ba-qadr-e-tishnagī hogī

taghaful par bhi un se dil ko ek wabastagi hogi

mohabbat ne mohabbat ki nazar pahchan li hogi

meri jaanib kisi din be-irada uTh gai hogi

nigah-e-naz ko phir bhi bahut zahmat hui hogi

ye 'adat hai hasinon ki to is 'adat ko kya kahiye

ki jis se dosti hogi usi se dushmani hogi

wahan bhi kashmakash pai wahi saudagari dekhi

main samjha tha ki maiKHane mein duniya dusri hogi

sitare chand suraj sham' sab ko aazma dekha

wo jab tashrif laenge to ghar mein raushni hogi

bahaar aane to do tum dekh lena ai chaman walo

meri diwangi mein bhi baDi shaistagi hogi

abhi un se ta'alluq hai nigahon se nigahon tak

kabhi wo muskuraenge kisi din baat bhi hogi

jahan Thahra hua sa hai faza badli hui si hai

mere saqi ne paimane ki gardish rok di hogi

jahan pahle nasheman tha wahan ab phul-patte hain

magar aasar kahte hain yahan bijli giri hogi

ye raaz-e-mai-kada sab ko nahin ma'lum ai 'mahir'

tawajjoh chashm-e-saqi ki ba-qadr-e-tishnagi hogi