taghayyuraat se kab rabt-e-gulsitan na raha

taġhayyurāt se kab rabt-e-gulsitāñ na rahā

bahār aa.ī to kyā ḳhatra-e-ḳhizāñ na rahā

jabīñ jhukā.ī to jannat ḳharīd lī jaise

samajh rahe haiñ ki ab koī imtihāñ na rahā

fazā meñ guuñj rahī haiñ kahāniyāñ ġham kī

hamīñ ko hausla-e-sharh-e-dāstāñ na rahā

unheñ to hashr meñ bhī hai ḳhayāl-e-rusvā.ī

hameñ ḳhushī hai koī parda darmiyāñ na rahā

ġham-e-ma.āl ġham-e-zindagī ġham-e-daurāñ

hamāre ishq kā charchā kahāñ kahāñ na rahā

havā palaTte hī har zaḳhm ho gayā taaza

bahār-e-ishq ko andesha-e-ḳhizāñ na rahā

'matīn' qadr huī aah kab nasheman kī

chaman meñ barq ke laa.eq jab āshiyāñ na rahā

taghayyuraat se kab rabt-e-gulsitan na raha

bahaar aai to kya KHatra-e-KHizan na raha

jabin jhukai to jannat KHarid li jaise

samajh rahe hain ki ab koi imtihan na raha

faza mein gunj rahi hain kahaniyan gham ki

hamin ko hausla-e-sharh-e-dastan na raha

unhen to hashr mein bhi hai KHayal-e-ruswai

hamein KHushi hai koi parda darmiyan na raha

gham-e-maal gham-e-zindagi gham-e-dauran

hamare ishq ka charcha kahan kahan na raha

hawa palaTte hi har zaKHm ho gaya taza

bahaar-e-ishq ko andesha-e-KHizan na raha

'matin' qadr hui aah kab nasheman ki

chaman mein barq ke laeq jab aashiyan na raha