tah-e-girdab to bachna mera dushwar hai phir bhi

tah-e-girdāb to bachnā mirā dushvār hai phir bhī

kināre duur haiñ TuuTī huī patvār hai phir bhī

thakan se chuur huuñ, sar rakh diyā hai us ke siine par

mujhe mā'lūm hai ye ret kī dīvār hai phir bhī

matā-e-rishta-e-jāñ kārobār-e-manfa.at kab thī

ḳharīdāroñ ke halqe meñ sar-e-bāzār hai phir bhī

mirī muTThī meñ nāzuk pankhuḌī mahfūz rahtī hai

bachānā sañg-bārī meñ use dushvār hai phir bhī

tire lahje kī shabnam jazb kar de kuchh namī is meñ

agarche dil sulagtī ret kā ambār hai phir bhī

charāġh-e-ārzū hai muntazir dahlīz par merī

vo duurī ke dhuñdlakoñ meñ bahut lāchār hai phir bhī

samundar tishnagī kā ab sarāb-e-ishq meñ zam hai

shikasta haal merā shīsha-e-pindār hai phir bhī

ye miTī chaak par thamtī nahīñ hai, itnī giilī hai

kaThin ye marhala hai, kūza-gar lā-chār hai phir bhī

tah-e-girdab to bachna mera dushwar hai phir bhi

kinare dur hain TuTi hui patwar hai phir bhi

thakan se chur hun, sar rakh diya hai us ke sine par

mujhe ma'lum hai ye ret ki diwar hai phir bhi

mata-e-rishta-e-jaan karobar-e-manfat kab thi

KHaridaron ke halqe mein sar-e-bazar hai phir bhi

meri muTThi mein nazuk pankhuDi mahfuz rahti hai

bachana sang-bari mein use dushwar hai phir bhi

tere lahje ki shabnam jazb kar de kuchh nami is mein

agarche dil sulagti ret ka ambar hai phir bhi

charagh-e-arzu hai muntazir dahliz par meri

wo duri ke dhundlakon mein bahut lachaar hai phir bhi

samundar tishnagi ka ab sarab-e-ishq mein zam hai

shikasta haal mera shisha-e-pindar hai phir bhi

ye miTi chaak par thamti nahin hai, itni gili hai

kaThin ye marhala hai, kuza-gar la-chaar hai phir bhi