tah mein har paikar ki ek paikar ubharta hai tera

tah meñ har paikar kī ik paikar ubhartā hai tirā

kaun iz.hār-e-musalsal rok saktā hai tirā

qatl ho jaatā hai jab sūraj diloñ ke dasht meñ

gahrī zulmat meñ ma.an sho.ala lapaktā hai tirā

naqsh ubharte haiñ tirī ḳhushbū ke sat.h-e-ḳhāk par

be-sadā gumbad meñ bhī taa.ir chahaktā hai tirā

sāġhar-e-gul se hazāroñ rañg uchhalte haiñ tire

ism-e-āzam sabz lauhoñ par chamaktā hai tirā

tāza-dam hai kitnī sadiyoñ kā safar karne ke ba.ad

qāfila kab dūri-e-manzil se thaktā hai tirā

lahlahātā hai dil-e-ishrat meñ roz o shab vo naḳhl

jis ke barg o shāḳh meñ mausam mahaktā hai tirā

tah mein har paikar ki ek paikar ubharta hai tera

kaun izhaar-e-musalsal rok sakta hai tera

qatl ho jata hai jab suraj dilon ke dasht mein

gahri zulmat mein man shoala lapakta hai tera

naqsh ubharte hain teri KHushbu ke sath-e-KHak par

be-sada gumbad mein bhi tair chahakta hai tera

saghar-e-gul se hazaron rang uchhalte hain tere

ism-e-azam sabz lauhon par chamakta hai tera

taza-dam hai kitni sadiyon ka safar karne ke baad

qafila kab duri-e-manzil se thakta hai tera

lahlahata hai dil-e-ishrat mein roz o shab wo naKHl

jis ke barg o shaKH mein mausam mahakta hai tera