tahajjud mein wo rang-o-bu raat bhar

tahajjud meñ vo rañg-o-bū raat bhar

ḳhudā se rahī guftugū raat bhar

jo ḳhvāboñ meñ lahrā.e phūloñ ke jaam

mahakte rahe be-subū raat bhar

huā jo sar-e-shām dil paash paash

kiyā tār-e-ġham se rafū raat bhar

vo tanhā.ī kā ḳhūb-sūrat hujūm

vo mela sar-e-āb-jū raat bhar

chamakte rahe āñsuoñ ke charāġh

kiyā yaad unheñ bā-vazū raat bhar

ye kamre se kaisī mahak aa.ī thī

vahāñ to na the maiñ na tū raat bhar

tumheñ 'nūr' ḳhushbū ne DhūñDā bahut

kahāñ tum rahe ai gurū raat bhar

tahajjud mein wo rang-o-bu raat bhar

KHuda se rahi guftugu raat bhar

jo KHwabon mein lahrae phulon ke jam

mahakte rahe be-subu raat bhar

hua jo sar-e-sham dil pash pash

kiya tar-e-gham se rafu raat bhar

wo tanhai ka KHub-surat hujum

wo mela sar-e-ab-ju raat bhar

chamakte rahe aansuon ke charagh

kiya yaad unhen ba-wazu raat bhar

ye kamre se kaisi mahak aai thi

wahan to na the main na tu raat bhar

tumhein 'nur' KHushbu ne DhunDa bahut

kahan tum rahe ai guru raat bhar