tahlil hui shab ki siyahi mein sada tak

tahlīl huī shab kī siyāhī meñ sadā tak

jalne na dī tūfān ne qindīl-e-anā tak

vo hashr ki kaTtā hī gayā rābta-e-hosh

vo jabr ki hoñThoñ pe nahīñ harf-e-du'ā tak

pahuñchā hī nahīñ tā-ba-falak nāla-e-jāñ-soz

is shahr meñ pāband-e-salāsil hai havā tak

ham banda-e-be-yār-o-madadgār the ḳhāmosh

ḳhāmosh rahā kūcha-e-qātil meñ ḳhudā tak

ādāb-e-vafā-jūī meñ ye sham'-e-pareshāñ

har rang meñ jaltī rahī takmīl-e-jafā tak

tahlil hui shab ki siyahi mein sada tak

jalne na di tufan ne qindil-e-ana tak

wo hashr ki kaTta hi gaya rabta-e-hosh

wo jabr ki honThon pe nahin harf-e-du'a tak

pahuncha hi nahin ta-ba-falak nala-e-jaan-soz

is shahr mein paband-e-salasil hai hawa tak

hum banda-e-be-yar-o-madadgar the KHamosh

KHamosh raha kucha-e-qatil mein KHuda tak

aadab-e-wafa-jui mein ye sham'-e-pareshan

har rang mein jalti rahi takmil-e-jafa tak