tahlil mausamon mein kar ke ajab nasha sa

tahlīl mausamoñ meñ kar ke ajab nasha sā

phailā huā hai har-sū kuchh din se rat-jagā sā

milte haiñ roz un se hasrat kī sarhadoñ par

rahtā hai phir bhī haa.il kyuuñ jaane fāsla sā

barsoñ ke sab marāsim toḌe haiñ us ne aise

pal bhar meñ TuuT jaa.e jis tarah aa.inā sā

taaza rafāqatoñ ke pur-kaif silsiloñ meñ

rahtā hai dil na jaane ab kyuuñ Darā Darā sā

merī balā se chāhat kī laakh bārisheñ hoñ

maiñ pahle bhī thā pyāsā maiñ aaj bhī huuñ pyāsā

donoñ meñ aaj tak vo pahlī sī tishnagī hai

phir vasl meñ nahīñ kyuuñ vo lutf ibtidā sā

tanhā.iyoñ kī zad meñ rahtī hai ruuh merī

is vāste huuñ yaaro maiñ aaj kal bujhā sā

Takrā ga.e jo un se ham raah meñ achānak

ik dāstāñ huī phir vo hadisā zarā sā

jis par nigāh Thahrī jān-e-'ḳhayāl' apnī

vo ajnabī hai lekin lagtā hai āshnā sā

tahlil mausamon mein kar ke ajab nasha sa

phaila hua hai har-su kuchh din se rat-jaga sa

milte hain roz un se hasrat ki sarhadon par

rahta hai phir bhi hail kyun jaane fasla sa

barson ke sab marasim toDe hain us ne aise

pal bhar mein TuT jae jis tarah aaina sa

taza rafaqaton ke pur-kaif silsilon mein

rahta hai dil na jaane ab kyun Dara Dara sa

meri bala se chahat ki lakh barishen hon

main pahle bhi tha pyasa main aaj bhi hun pyasa

donon mein aaj tak wo pahli si tishnagi hai

phir wasl mein nahin kyun wo lutf ibtida sa

tanhaiyon ki zad mein rahti hai ruh meri

is waste hun yaro main aaj kal bujha sa

Takra gae jo un se hum rah mein achanak

ek dastan hui phir wo hadisa zara sa

jis par nigah Thahri jaan-e-'KHayal' apni

wo ajnabi hai lekin lagta hai aashna sa