tai hai ab rah-e-mohabbat se guzarna mera

tai hai ab rāh-e-mohabbat se guzarnā merā

phir usī raah meñ ḳhushbū sā bikharnā merā

ab bhī zinda haiñ kahīñ mujh meñ vo pahlī sī maiñ

ho tirī baat to dhīme se mukarnā merā

thā yaqīñ dil ko tum aaoge manāne mujh ko

phir vo har ġham pe ruknā vo Thaharnā merā

kaifiyat hai ye 'ajab sī hai 'ajab sā 'ālam

bas tumheñ soch ke har pal hai sañvarnā merā

ab koī ḳhauf nahīñ us se bichhaḌ jaane kā

kitnī hairat se vo dekhe hai na Darnā merā

kyā ye vahshat hai junūñ hai ki fusūñ hai kyā hai

chāhnā Tuut ke phir yuñhī bipharnā merā

tai hai ab rah-e-mohabbat se guzarna mera

phir usi rah mein KHushbu sa bikharna mera

ab bhi zinda hain kahin mujh mein wo pahli si main

ho teri baat to dhime se mukarna mera

tha yaqin dil ko tum aaoge manane mujh ko

phir wo har gham pe rukna wo Thaharna mera

kaifiyat hai ye 'ajab si hai 'ajab sa 'alam

bas tumhein soch ke har pal hai sanwarna mera

ab koi KHauf nahin us se bichhaD jaane ka

kitni hairat se wo dekhe hai na Darna mera

kya ye wahshat hai junun hai ki fusun hai kya hai

chahna Tut ke phir yunhi bipharna mera