tajalli tur ki har su ayan hai

tajallī tuur kī har sū ayaañ hai

magar zauq-e-kalīmāna kahāñ hai

yahī hai rahbarī ai rahnumāo

na manzil hai na manzil kā nishāñ hai

lahū rotā hai jo auroñ kī ḳhātir

haqīqat meñ vahī dil shādmāñ hai

ajab shai hai rabāb-e-zindagī bhī

kabhī naġhma kabhī āh-o-fuġhāñ hai

agar vaqf-e-mohabbat ho to ne.amat

nahīñ to zindagī bār-e-garāñ hai

karishma hai ye terī be-ruḳhī kā

zamīñ dushman falak nā-mehrbāñ hai

ḳhirad kī raah meñ barg-e-gul-e-tar

junūñ kī raah meñ sang-e-girāñ hai

sun ai bedād-gar begāna-ḳhū sun

ye ḳhāmoshī bhī ik tarz-e-fuġhāñ hai

munavvar hai bashar kā zehn lekin

harīm-e-dil abhī zulmat-nishāñ hai

gulistāñ kī fazā ab bhī na badlī

vahī gulchīñ vahī barq-e-tapāñ hai

rihā.ī qaid se bad-tar hai ya.anī

dil-e-tā.ir asīr-e-āshiyāñ hai

miTāne se kahāñ miTtī hai 'sābir'

ye urdu 'mīr'-o-'ġhālib' kī zabāñ hai

tajalli tur ki har su ayan hai

magar zauq-e-kalimana kahan hai

yahi hai rahbari ai rahnumao

na manzil hai na manzil ka nishan hai

lahu rota hai jo auron ki KHatir

haqiqat mein wahi dil shadman hai

ajab shai hai rabab-e-zindagi bhi

kabhi naghma kabhi aah-o-fughan hai

agar waqf-e-mohabbat ho to neamat

nahin to zindagi bar-e-garan hai

karishma hai ye teri be-ruKHi ka

zamin dushman falak na-mehrban hai

KHirad ki rah mein barg-e-gul-e-tar

junun ki rah mein sang-e-giran hai

sun ai bedad-gar begana-KHu sun

ye KHamoshi bhi ek tarz-e-fughan hai

munawwar hai bashar ka zehn lekin

harim-e-dil abhi zulmat-nishan hai

gulistan ki faza ab bhi na badli

wahi gulchin wahi barq-e-tapan hai

rihai qaid se bad-tar hai yani

dil-e-tair asir-e-ashiyan hai

miTane se kahan miTti hai 'sabir'

ye urdu 'mir'-o-'ghaalib' ki zaban hai