tajdid-e-mulaqat ki hasrat nahin hoti

tajdīd-e-mulāqāt kī hasrat nahīñ hotī

milte haiñ magar pahlī sī chāhat nahīñ hotī

ham us kī har ik chaal samajh jaate haiñ pahle

ab us kī kisī chaal pe hairat nahīñ hotī

nā-qābil-e-taslīm hai ab us kā chalan bhī

mushkil hai ki us shaḳhs se nafrat nahīñ hotī

sochā hai ka.ī baar kareñ us kī shikāyat

karte haiñ shikāyat to shikāyat nahīñ hotī

ma.amūl sā lagtā hai hameñ hijr kā mausam

ab us se bichhaḌte hue vahshat nahīñ hotī

jin bachchoñ ko māñ-bāp mohabbat nahīñ dete

un bachchoñ se māñ-bāp kī ḳhidmat nahīñ hotī

vo mujh ko Darātā hai judā.ī kī sazā se

ḳhud us ko judā.ī kī jasārat nahīñ hotī

ham DhūñDte rahte haiñ laḌā.ī ke bahāne

lekin kabhī laḌne kī bhī himmat nahīñ hotī

ik hifz-e-marāsim kī rivāyat thī ga.ī vo

ab tark-e-ta.alluq pe aziyyat nahīñ hotī

ham us ko bhulāne ke jatan kar to chuke haiñ

is tarah magar ḳhatm mohabbat nahīñ hotī

vo tum se ḳhafā hai to use ḳhud hī manāo

apnoñ ko manāne meñ qabāhat nahīñ hotī

ab tere tahā.if ko sañbhālā nahīñ jaatā

ham se tirī yādoñ kī hifāzat nahīñ hotī

jo mahr anā-gīr thī vo kaT bhī chukī hai

ab pichhle pahar tark-e-rifāqat nahīñ hotī

ik pal bhī tire shahr meñ rahnā huā mushkil

mushkil hai ki ab naql-e-sukūnat nahīñ hotī

ham koste rahte haiñ 'salīm' ahl-e-havas ko

kyoñ ham se ḳhilāf un ke baġhāvat nahīñ hotī

tajdid-e-mulaqat ki hasrat nahin hoti

milte hain magar pahli si chahat nahin hoti

hum us ki har ek chaal samajh jate hain pahle

ab us ki kisi chaal pe hairat nahin hoti

na-qabil-e-taslim hai ab us ka chalan bhi

mushkil hai ki us shaKHs se nafrat nahin hoti

socha hai kai bar karen us ki shikayat

karte hain shikayat to shikayat nahin hoti

mamul sa lagta hai hamein hijr ka mausam

ab us se bichhaDte hue wahshat nahin hoti

jin bachchon ko man-bap mohabbat nahin dete

un bachchon se man-bap ki KHidmat nahin hoti

wo mujh ko Daraata hai judai ki saza se

KHud us ko judai ki jasarat nahin hoti

hum DhunDte rahte hain laDai ke bahane

lekin kabhi laDne ki bhi himmat nahin hoti

ek hifz-e-marasim ki riwayat thi gai wo

ab tark-e-talluq pe aziyyat nahin hoti

hum us ko bhulane ke jatan kar to chuke hain

is tarah magar KHatm mohabbat nahin hoti

wo tum se KHafa hai to use KHud hi manao

apnon ko manane mein qabahat nahin hoti

ab tere tahaif ko sanbhaala nahin jata

hum se teri yaadon ki hifazat nahin hoti

jo mahr ana-gir thi wo kaT bhi chuki hai

ab pichhle pahar tark-e-rifaqat nahin hoti

ek pal bhi tere shahr mein rahna hua mushkil

mushkil hai ki ab naql-e-sukunat nahin hoti

hum koste rahte hain 'salim' ahl-e-hawas ko

kyon hum se KHilaf un ke baghawat nahin hoti