tajrabe ke dasht se dil ko guzarne ke liye

tajrabe ke dasht se dil ko guzarne ke liye

roz ik sūrat na.ī hai ġhaur karne ke liye

jab koī bantā hai lākhoñ hastiyoñ ko meT kar

sub.h tāroñ ko dabātī hai ubharne ke liye

hāmil-e-asrār-e-fitrat huuñ gadā bhī huuñ to kyā

baat ye kaafī hai mujh ko faḳhr karne ke liye

ruuh ko chamkā ḳhudī ko toḌ kar ziine banā

do ye tadbīreñ haiñ duniyā meñ ubharne ke liye

ġhaur se dekhā nizām-e-dahr to sābit huā

aadmī paidā huā hai kaam karne ke liye

sub.h uTh kar āñsuoñ se ḳhuun ke rotā huuñ maiñ

dil ke naqshe meñ vafā kā rañg bharne ke liye

gauhar-e-maqsūd ḳhud miltā hai himmat shart hai

muztarib rahtā hai har motī ubharne ke liye

aañkh sharmā.ī huī hai baal peshānī pe haiñ

ā.īna-ḳhāne meñ jaate haiñ sañvarne ke liye

kah do duniyā ke havādis se na chheḌeñ is tarah

'josh' ham tayyār hī baiThe haiñ marne ke liye

tajrabe ke dasht se dil ko guzarne ke liye

roz ek surat nai hai ghaur karne ke liye

jab koi banta hai lakhon hastiyon ko meT kar

subh taron ko dabaati hai ubharne ke liye

hamil-e-asrar-e-fitrat hun gada bhi hun to kya

baat ye kafi hai mujh ko faKHr karne ke liye

ruh ko chamka KHudi ko toD kar zine bana

do ye tadbiren hain duniya mein ubharne ke liye

ghaur se dekha nizam-e-dahr to sabit hua

aadmi paida hua hai kaam karne ke liye

subh uTh kar aansuon se KHun ke rota hun main

dil ke naqshe mein wafa ka rang bharne ke liye

gauhar-e-maqsud KHud milta hai himmat shart hai

muztarib rahta hai har moti ubharne ke liye

aankh sharmai hui hai baal peshani pe hain

aaina-KHane mein jate hain sanwarne ke liye

kah do duniya ke hawadis se na chheDen is tarah

'josh' hum tayyar hi baiThe hain marne ke liye