tak raha hai tu aasman mein kya

tak rahā hai tū āsmān meñ kyā

hai abhī tak kisī uḌaan meñ kyā

vo jo ik tujh ko jaañ se pyārā thā

ab bhī aatā hai tere dhyān meñ kyā

kyā nahīñ hogī phir mirī takmīl

koī tujh sā nahīñ jahān meñ kyā

ham to terī kahānī likh aa.e

tū ne likkhā hai imtihān meñ kyā

ho hī jaate haiñ jab judā donoñ

phir ta.alluq hai jism-o-jān meñ kyā

ham qafas meñ haiñ uḌne vaale batā

hai vahī lutf āsmān meñ kyā

paḌh rahe ho jo itnī ġhaur se tum

kuchh nayā-pan hai dāstān meñ kyā

urdu vaale kamāl dikhte haiñ

koī jaadū hai is zabān meñ kyā

tak raha hai tu aasman mein kya

hai abhi tak kisi uDan mein kya

wo jo ek tujh ko jaan se pyara tha

ab bhi aata hai tere dhyan mein kya

kya nahin hogi phir meri takmil

koi tujh sa nahin jahan mein kya

hum to teri kahani likh aae

tu ne likkha hai imtihan mein kya

ho hi jate hain jab juda donon

phir talluq hai jism-o-jaan mein kya

hum qafas mein hain uDne wale bata

hai wahi lutf aasman mein kya

paDh rahe ho jo itni ghaur se tum

kuchh naya-pan hai dastan mein kya

urdu wale kamal dikhte hain

koi jadu hai is zaban mein kya