taKHti qalam dawat se pahle ki baat hai

taḳhtī qalam davāt se pahle kī baat hai

ye ishq kā.enāt se pahle kī baat hai

sach hai ki maiñ bhī pyaar kā munkir banā rahā

haañ haañ ye terī zaat se pahle kī baat hai

ab to tire ġhalat pe bhī āmīn kah diyā

inkār terī baat se pahle kī baat hai

bas be-sabab furāt pe ilzām aa gayā

ye pyaas to furāt se pahle kī baat hai

kin kā dahan talāsh kareñ mil ke dosto

ye lafz shash-jahāt se pahle kī baat hai

maiñ naaz zindagī ke uThātā rahā bajā

par ye mirī vafāt se pahle kī baat hai

ik karb-e-nā-tamām se niklā to ro paḌā

merī ḳhushī najāt se pahle kī baat hai

'kāzim' thā ḳhauf rizq-e-suḳhan meñ kamī na ho

ye ishq kī zakāt se pahle kī baat hai

taKHti qalam dawat se pahle ki baat hai

ye ishq kaenat se pahle ki baat hai

sach hai ki main bhi pyar ka munkir bana raha

han han ye teri zat se pahle ki baat hai

ab to tere ghalat pe bhi aamin kah diya

inkar teri baat se pahle ki baat hai

bas be-sabab furaat pe ilzam aa gaya

ye pyas to furaat se pahle ki baat hai

kin ka dahan talash karen mil ke dosto

ye lafz shash-jahat se pahle ki baat hai

main naz zindagi ke uThata raha baja

par ye meri wafat se pahle ki baat hai

ek karb-e-na-tamam se nikla to ro paDa

meri KHushi najat se pahle ki baat hai

'kazim' tha KHauf rizq-e-suKHan mein kami na ho

ye ishq ki zakat se pahle ki baat hai