Takra rahi hain tez hawaen chaTan se

Takrā rahī haiñ tez havā.eñ chaTān se

bāhar na jaao apne shikasta makān se

vo raat bhar charāġh kī lau dekhtā rahā

imkāñ tarāshtā hai jo apne gumān se

azm-e-safar hai dhuup kā sahrā hai aur maiñ

dariyā to saath chhoḌ gayā darmiyān se

vo mausam-e-ḳhizāñ kī thakan hī meñ jal ga.e

bāhar khile jo phuul tire sā.ebān se

ik umr ho ga.ī hai ki Dartā rahā huuñ maiñ

raushan charāġh se kabhī andhe makān se

gahre samundaroñ meñ sitāra na thā koī

sāhil kī shaam mil na sakī bādbān se

dīvār aa.ine kī hai shīshe ke bām-o-dar

lekin ġhubār uThtā hai mere makān se

Takra rahi hain tez hawaen chaTan se

bahar na jao apne shikasta makan se

wo raat bhar charagh ki lau dekhta raha

imkan tarashta hai jo apne guman se

azm-e-safar hai dhup ka sahra hai aur main

dariya to sath chhoD gaya darmiyan se

wo mausam-e-KHizan ki thakan hi mein jal gae

bahar khile jo phul tere saeban se

ek umr ho gai hai ki Darta raha hun main

raushan charagh se kabhi andhe makan se

gahre samundaron mein sitara na tha koi

sahil ki sham mil na saki baadban se

diwar aaine ki hai shishe ke baam-o-dar

lekin ghubar uThta hai mere makan se