talāsh-e-rañg meñ āvāra misl-e-bū huuñ maiñ
guzar ke aap se apnī hī justujū huuñ maiñ
nafas hai saḳhtī-e-qaid-e-hayāt kā zāmin
nikal sake jo na phāñsī se vo gulū huuñ maiñ
nishān-e-hastī faanī hai dāġh-e-nākāmī
ḳhud apnī aañkh se Tapkā huā lahū huuñ maiñ
misāl-e-paikar-e-sīmāb-e-iztirāb mudām
pa-e-nigāh-e-karam sharh-e-ārzū huuñ maiñ
mirī zabāñ pe haiñ andesha-hā-e-nākāmī
samajh rahe haiñ vo dil meñ ki hīla-jū huuñ maiñ
abhī hai āb-e-nadāmat sar-e-jabīñ baaqī
namāz aise maiñ paḌh luuñ ki bā-vazū huuñ maiñ
huuñ kuchh na hone pe bhī kā.enāt kā hāsil
ki apnā shauq nahīñ terī aarzū huuñ maiñ
misāl-e-ma.anī-e-be-lafz-o-lafz-e-be-ma.anī
jo tere dil meñ nahīñ hai vo 'ārzū' huuñ maiñ
talash-e-rang mein aawara misl-e-bu hun main
guzar ke aap se apni hi justuju hun main
nafas hai saKHti-e-qaid-e-hayat ka zamin
nikal sake jo na phansi se wo gulu hun main
nishan-e-hasti fani hai dagh-e-nakaami
KHud apni aankh se Tapka hua lahu hun main
misal-e-paikar-e-simab-e-iztirab mudam
pa-e-nigah-e-karam sharh-e-arzu hun main
meri zaban pe hain andesha-ha-e-nakaami
samajh rahe hain wo dil mein ki hila-ju hun main
abhi hai aab-e-nadamat sar-e-jabin baqi
namaz aise main paDh lun ki ba-wazu hun main
hun kuchh na hone pe bhi kaenat ka hasil
ki apna shauq nahin teri aarzu hun main
misal-e-mani-e-be-lafz-o-lafz-e-be-mani
jo tere dil mein nahin hai wo 'arzu' hun main
Source:
Nishaan-e-Aarzu (Pg. ebook-78 page-68)
-
Author:
Anwar Husain Arzoo
-
- Year of Publication: 1968
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.