talab roTi ki taDpae to KHatre bhul jate hain

talab roTī kī taḌpā.e to ḳhatre bhuul jaate haiñ

parindoñ ko shikārī ke shikanje bhuul jaate haiñ

zamāne ne azal se hī ye apnī riit hai rakkhī

jo sastā kuchh mayassar ho to mahñge bhuul jaate haiñ

mashaqqat kī nahaj ik din unheñ kundan banātī hai

jo bachche muflisī kī zad meñ baste bhuul jaate haiñ

huā hai ḳhuun kā pyāsā yahāñ par har koī banda

havas daulat kī baḌh jaa.e to apne bhuul jaate haiñ

sabhī kāmoñ ko apne ham nibhāte haiñ salīqe se

ulajh kar terī yādoñ meñ nivāle bhuul jaate haiñ

tū apnī be-navā.ī par ziyāda ġham na kar 'nāsir'

lage jab ishq kī Thokar to raste bhuul jaate haiñ

talab roTi ki taDpae to KHatre bhul jate hain

parindon ko shikari ke shikanje bhul jate hain

zamane ne azal se hi ye apni rit hai rakkhi

jo sasta kuchh mayassar ho to mahnge bhul jate hain

mashaqqat ki nahaj ek din unhen kundan banati hai

jo bachche muflisi ki zad mein baste bhul jate hain

hua hai KHun ka pyasa yahan par har koi banda

hawas daulat ki baDh jae to apne bhul jate hain

sabhi kaamon ko apne hum nibhate hain saliqe se

ulajh kar teri yaadon mein niwale bhul jate hain

tu apni be-nawai par ziyaada gham na kar 'nasir'

lage jab ishq ki Thokar to raste bhul jate hain