tamam falsafe baatil bana diye gae hain

tamām falsafe bātil banā diye ga.e haiñ

aur ahl-e-ilm bhī qātil banā diye ga.e haiñ

aqīda oḌhne vaale to the barahna ruuh

faqīr log bhī ġhāfil banā diye ga.e haiñ

kisī kā dhyān gayā kyoñ na mā-sa'ā kī taraf

duā ke naam pe kāhil banā diye ga.e haiñ

utāq-e-zehn kī dīvāreñ ḳhuuñ se lat-pat haiñ

parinde photo meñ ghā.il banā diye ga.e haiñ

ḳhabar milī thī use giilī ret bhātī hai

tamām shahr meñ sāhil banā diye ga.e haiñ

tamam falsafe baatil bana diye gae hain

aur ahl-e-ilm bhi qatil bana diye gae hain

aqida oDhne wale to the barahna ruh

faqir log bhi ghafil bana diye gae hain

kisi ka dhyan gaya kyon na ma-sa'a ki taraf

dua ke nam pe kahil bana diye gae hain

utaq-e-zehn ki diwaren KHun se lat-pat hain

parinde photo mein ghail bana diye gae hain

KHabar mili thi use gili ret bhati hai

tamam shahr mein sahil bana diye gae hain