tamam KHwab adhure uTha ke rakkhe hain

tamām ḳhvāb adhūre uThā ke rakkhe haiñ

kabhī to hoñge ye puure uThā ke rakkhe haiñ

tumhāre naam kā paikar banā ke rakkhā hai

tumhāre naam ke chehre uThā ke rakkhe haiñ

ye kyā ki chāñd to bādal meñ jā ke baiThā hai

so ham ne jugnū sunahre uThā ke rakkhe haiñ

ye terī shoḳh adā.eñ haiñ aur mirī larzish

ki jitne pahre the saare uThā ke rakkhe haiñ

hameñ patā hai safar hai to dhuup bhī hogī

to ham ne peḌ ghanere uThā ke rakkhe haiñ

tumhārī yādeñ tilismāt haiñ nikalnā kyā

tumārī yaad ke pahre uThā ke rakkhe haiñ

kashīdgī kā ye aalam bhī biit jā.egā

hamāre rishte haiñ gahre uThā ke rakkhe haiñ

tamam KHwab adhure uTha ke rakkhe hain

kabhi to honge ye pure uTha ke rakkhe hain

tumhaare nam ka paikar bana ke rakkha hai

tumhaare nam ke chehre uTha ke rakkhe hain

ye kya ki chand to baadal mein ja ke baiTha hai

so hum ne jugnu sunahre uTha ke rakkhe hain

ye teri shoKH adaen hain aur meri larzish

ki jitne pahre the sare uTha ke rakkhe hain

hamein pata hai safar hai to dhup bhi hogi

to hum ne peD ghanere uTha ke rakkhe hain

tumhaari yaaden tilismat hain nikalna kya

tumari yaad ke pahre uTha ke rakkhe hain

kashidgi ka ye aalam bhi bit jaega

hamare rishte hain gahre uTha ke rakkhe hain