tamam qahr-o-bala se hai wasta mera

tamām qahr-o-balā se hai vāsta merā

har ek hādisa lagtā hai hādisa merā

havā sunātī hai nauhagarī shahādat kā

har ek mauj pe likkhā hai marsiya merā

vo kaun hai mire andar jo vaar kartā hai

ye kis harīf se Thahrā muqābla merā

koī kitāb uThā.ūñ to ḳhuuñ Tapaktā hai

ye kaun kar gayā zaḳhmī mutāla merā

ḳhudā gavāh ki un kī zamīn tang huī

durust karne chale the jo qāfiya merā

tuyūr aa.e magar un kī choñch ḳhālī thī

farār ho gayā lashkar se abraha merā

ye kyā huā ki achānak dahal uThe bachche

vo koī pūchh rahā hai vahāñ pata merā

bichhaḌ ke us se har ik shai bichhaḌ ga.ī mujh se

usī kā aks dikhātā hai ā.īna merā

mujhe gumān kī merā zamīr zinda hai

use yaqīn ki sab kuchh hai vāhima merā

har ik balā kā mujhī par nuzūl hotā hai

likhā huā hai falak par kahīñ pata merā

falak-shigāf mirī chīḳh jab ubhartī hai

sunā.ī detā hai logoñ ko qahqaha merā

kise paḌī hai jo gahrā.iyoñ meñ utregā

yahāñ pe kaun samajhtā hai falsafa merā

maiñ barg-e-gul se karūñgā muqābla us kā

sunā do jā ke ye qātil ko faisla merā

tamam qahr-o-bala se hai wasta mera

har ek hadisa lagta hai hadisa mera

hawa sunati hai nauhagari shahadat ka

har ek mauj pe likkha hai marsiya mera

wo kaun hai mere andar jo war karta hai

ye kis harif se Thahra muqabla mera

koi kitab uThaun to KHun Tapakta hai

ye kaun kar gaya zaKHmi mutala mera

KHuda gawah ki un ki zamin tang hui

durust karne chale the jo qafiya mera

tuyur aae magar un ki chonch KHali thi

farar ho gaya lashkar se abraha mera

ye kya hua ki achanak dahal uThe bachche

wo koi puchh raha hai wahan pata mera

bichhaD ke us se har ek shai bichhaD gai mujh se

usi ka aks dikhata hai aaina mera

mujhe guman ki mera zamir zinda hai

use yaqin ki sab kuchh hai wahima mera

har ek bala ka mujhi par nuzul hota hai

likha hua hai falak par kahin pata mera

falak-shigaf meri chiKH jab ubharti hai

sunai deta hai logon ko qahqaha mera

kise paDi hai jo gahraiyon mein utrega

yahan pe kaun samajhta hai falsafa mera

main barg-e-gul se karunga muqabla us ka

suna do ja ke ye qatil ko faisla mera