tamam raat bujhenge na mere ghar ke charagh

tamām raat bujheñge na mere ghar ke charāġh

ki ye charāġh haiñ ḳhūn-e-dil-o-jigar ke charāġh

in āñsuoñ ko sitāre salām karte haiñ

bujhā sako to bujhā do ye chashm-e-tar ke charāġh

huā na aisā charāġhāñ kabhī sar-e-maqtal

hatheliyoñ pe haiñ raushan burīda-sar ke charāġh

unhīñ pe chalne se manzil milegī ham-safaro

ye naqsh-e-pā haiñ kisī ke ki rahguzar ke charāġh

is anjuman meñ ujālā rahegā sadiyoñ tak

jalā rahā huuñ musalsal dil-o-nazar ke charāġh

ye lāl-qil.a ye dīvār-e-chīñ ye tāj-mahal

ye sab ke sab haiñ jalā.e hue bashar ke charāġh

'habāb' shahr-e-sabā meñ vo qumqumoñ kī bahār

galī galī meñ farozāñ the sīm-o-zar ke charāġh

tamam raat bujhenge na mere ghar ke charagh

ki ye charagh hain KHun-e-dil-o-jigar ke charagh

in aansuon ko sitare salam karte hain

bujha sako to bujha do ye chashm-e-tar ke charagh

hua na aisa charaghan kabhi sar-e-maqtal

hatheliyon pe hain raushan burida-sar ke charagh

unhin pe chalne se manzil milegi ham-safaro

ye naqsh-e-pa hain kisi ke ki rahguzar ke charagh

is anjuman mein ujala rahega sadiyon tak

jala raha hun musalsal dil-o-nazar ke charagh

ye lal-qila ye diwar-e-chin ye taj-mahal

ye sab ke sab hain jalae hue bashar ke charagh

'habab' shahr-e-saba mein wo qumqumon ki bahaar

gali gali mein farozan the sim-o-zar ke charagh