tamam raat paDi thi ki din nikal aaya

tamām raat paḌī thī ki din nikal aayā

abhī to aañkh lagī thī ki din nikal aayā

yaqīñ ho puḳhta to phir shab badal bhī saktī hai

ye baat us ne kahī thī ki din nikal aayā

ye mo.ajaza bhī hamīñ par tamām honā thā

vo bas zarā sā hañsī thī ki din nikal aayā

maiñ din nikalne kā vaise bhī muntazir thā bahut

ye jaan ḳhvāb huī thī ki din nikal aayā

sahar se pahle bhalā din kahāñ nikaltā hai

zarā sī baat banī thī ki din nikal aayā

zarā sā dard huā thā ki dil chamak uTThā

zarā sī sub.h huī thī ki din nikal aayā

kareñ jo ġhaur yahī hai nizām-e-qudrat 'tūr'

ye raat ḳhatm huī thī ki din nikal aayā

tamam raat paDi thi ki din nikal aaya

abhi to aankh lagi thi ki din nikal aaya

yaqin ho puKHta to phir shab badal bhi sakti hai

ye baat us ne kahi thi ki din nikal aaya

ye moajaza bhi hamin par tamam hona tha

wo bas zara sa hansi thi ki din nikal aaya

main din nikalne ka waise bhi muntazir tha bahut

ye jaan KHwab hui thi ki din nikal aaya

sahar se pahle bhala din kahan nikalta hai

zara si baat bani thi ki din nikal aaya

zara sa dard hua tha ki dil chamak uTTha

zara si subh hui thi ki din nikal aaya

karen jo ghaur yahi hai nizam-e-qudrat 'tur'

ye raat KHatm hui thi ki din nikal aaya