tamam shahr ko jo sach hai wo bataunga

tamām shahr ko jo sach hai vo batā.ūñgā

phir us kī jitnī bhī qīmat huī chukā.ūñgā

maiñ hijr vāloñ kā ik qāfila banā.ūñgā

tumhāre baa'd bhī jī kar tumheñ dikhā.ūñgā

jinhoñ ne mil ke mire haath kaaT Daale haiñ

unheñ ye Dar thā ki maiñ aa.ina banā.ūñgā

ye pahlā ishq bhulānā kaThin to hai lekin

kabhī tū aanā tujhe maiñ duā sikhā.ūñgā

tumhārī jiit ko bas dekhne kī ḳhvāhish hai

so haq pe ho ke bhī āḳhir meñ haar jā.ūñgā

us ek baat meñ kitnī baḌī aziyyat thī

jab us ne itnā kahā soch kar batā.ūñgā

isī sabab se maiñ logoñ se ab nahīñ miltā

'saġhīr' us ne kahā thā gale lagā.ūñgā

tamam shahr ko jo sach hai wo bataunga

phir us ki jitni bhi qimat hui chukaunga

main hijr walon ka ek qafila banaunga

tumhaare ba'd bhi ji kar tumhein dikhaunga

jinhon ne mil ke mere hath kaT Dale hain

unhen ye Dar tha ki main aaina banaunga

ye pahla ishq bhulana kaThin to hai lekin

kabhi tu aana tujhe main dua sikhaunga

tumhaari jit ko bas dekhne ki KHwahish hai

so haq pe ho ke bhi aaKHir mein haar jaunga

us ek baat mein kitni baDi aziyyat thi

jab us ne itna kaha soch kar bataunga

isi sabab se main logon se ab nahin milta

'saghir' us ne kaha tha gale lagaunga