tamam shaKHsiyat uski hasin nazar aai

tamām shaḳhsiyat us kī hasīñ nazar aa.ī

jab us ke qatl kī aḳhbār meñ ḳhabar aa.ī

sharīf log chaḌhe jab nahīñ haiñ koThoñ par

to kis ke saath ye tahzīb baam par aa.ī

guzar ke mujh ko ḳhad-o-ḳhāl ke sarāboñ se

tamām shahr meñ be-chehragī nazar aa.ī

ḳhamosh kyā huī buḌhiyā safed bāloñ kī

kahāniyoñ kī koī raat phir na ghar aa.ī

ajiib shaḳhs thā kuchh der guftugū jo huī

dil o dimāġh meñ ik raushnī utar aa.ī

duā.eñ maañg rahe the havā kī log magar

havā chalī bhī to āñkhoñ meñ dhuul bhar aa.ī

gulāb TuuT ke bikhrā thā kal jahāñ 'az.har'

usī maqām pe ḳhushbū mujhe nazar aa.ī

tamam shaKHsiyat us ki hasin nazar aai

jab us ke qatl ki aKHbar mein KHabar aai

sharif log chaDhe jab nahin hain koThon par

to kis ke sath ye tahzib baam par aai

guzar ke mujh ko KHad-o-KHal ke sarabon se

tamam shahr mein be-chehragi nazar aai

KHamosh kya hui buDhiya safed baalon ki

kahaniyon ki koi raat phir na ghar aai

ajib shaKHs tha kuchh der guftugu jo hui

dil o dimagh mein ek raushni utar aai

duaen mang rahe the hawa ki log magar

hawa chali bhi to aankhon mein dhul bhar aai

gulab TuT ke bikhra tha kal jahan 'azhar'

usi maqam pe KHushbu mujhe nazar aai