tamam-umr chala hun magar chala na gaya

tamām-umr chalā huuñ magar chalā na gayā

tirī galī kī taraf koī rāsta na gayā

tire ḳhayāl ne pahnā shafaq kā pairāhan

mirī nigāh se rañgoñ kā silsila na gayā

baḌā ajiib hai afsāna-e-mohabbat bhī

zabāñ se kyā ye nigāhoñ se bhī kahā na gayā

ubhar rahe haiñ fazāoñ meñ sub.h ke āsār

ye aur baat mire dil kā Dūbnā na gayā

khule darīchoñ se aayā na ek jhoñkā bhī

ghuTan baḌhī to havāoñ se dostāna gayā

kisī ke hijr se aage baḌhī na umr mirī

vo raat biit ga.ī 'naqsh' ratjagā na gayā

tamam-umr chala hun magar chala na gaya

teri gali ki taraf koi rasta na gaya

tere KHayal ne pahna shafaq ka pairahan

meri nigah se rangon ka silsila na gaya

baDa ajib hai afsana-e-mohabbat bhi

zaban se kya ye nigahon se bhi kaha na gaya

ubhar rahe hain fazaon mein subh ke aasar

ye aur baat mere dil ka Dubna na gaya

khule darichon se aaya na ek jhonka bhi

ghuTan baDhi to hawaon se dostana gaya

kisi ke hijr se aage baDhi na umr meri

wo raat bit gai 'naqsh' ratjaga na gaya