tamam umr kisi ka sahaara mil na saka

tamām umr kisī kā sahārā mil na sakā

maiñ aisā dariyā thā jis ko kinārā mil na sakā

tabāhiyoñ ke manāzir har aañkh raushan the

mohabbatoñ kā kahīñ isti.ārā mil na sakā

tamām ziist rahī nazr-e-ābla-pā.ī

safar ke ḳhatm kā ham ko ishārā mil na sakā

kabhī jo sab ke liye bā.is-e-mohabbat thā

mujhe vajūd vo aisā dobārā mil na sakā

khulī rahī haiñ hamesha safar meñ āñkheñ mirī

nigāh-e-shauq ko rangīñ nazārā mil na sakā

mirī hayāt meñ thī jis ke lams kī garmī

mire nafas ko phir aisā sharārā mil na sakā

fazā-e-shahr pe har samt thā dhuāñ 'naqvī'

kahīñ pe koī bhī raushan sitārā mil na sakā

tamam umr kisi ka sahaara mil na saka

main aisa dariya tha jis ko kinara mil na saka

tabahiyon ke manazir har aankh raushan the

mohabbaton ka kahin istiara mil na saka

tamam zist rahi nazr-e-abla-pai

safar ke KHatm ka hum ko ishaara mil na saka

kabhi jo sab ke liye bais-e-mohabbat tha

mujhe wajud wo aisa dobara mil na saka

khuli rahi hain hamesha safar mein aankhen meri

nigah-e-shauq ko rangin nazara mil na saka

meri hayat mein thi jis ke lams ki garmi

mere nafas ko phir aisa sharara mil na saka

faza-e-shahr pe har samt tha dhuan 'naqwi'

kahin pe koi bhi raushan sitara mil na saka