tamam umr yahi aarzu kiye jao

tamām 'umr yahī aarzū kiye jaao

mile vo yā na mile justujū kiye jaao

nahīñ surūr to yād-e-surūr kyā kam hai

tum aaj zikr-e-sharāb-o-subū kiye jaao

yaqīñ karo ki milegī zarūr manzil-e-dost

magar ye shart bhī hai justujū kiye jaao

kisī kī shoḳh nazar se nazar jo mil jaa.e

zabāñ ḳhamosh rahe guftugū kiye jaao

farishte rashk kareñge falak pe ai 'sajjād'

tum apne dāman-e-tar se vuzū kiye jaao

tamam 'umr yahi aarzu kiye jao

mile wo ya na mile justuju kiye jao

nahin surur to yaad-e-surur kya kam hai

tum aaj zikr-e-sharab-o-subu kiye jao

yaqin karo ki milegi zarur manzil-e-dost

magar ye shart bhi hai justuju kiye jao

kisi ki shoKH nazar se nazar jo mil jae

zaban KHamosh rahe guftugu kiye jao

farishte rashk karenge falak pe ai 'sajjad'

tum apne daman-e-tar se wuzu kiye jao