tamashe ki shaklen ayan ho gai hain

tamāshe kī shakleñ ayaañ ho ga.ī haiñ

bahāreñ bahut yaañ ḳhizāñ ho ga.ī haiñ

ḳhabar pas-ravoñ se tum un kī na pūchho

jo rūheñ adam ko ravāñ ho ga.ī haiñ

nikālī haiñ jo ham ne auj-e-suḳhan se

zamīneñ vo sab āsmāñ ho ga.ī haiñ

unheñ farz hai tiir kā kis ke sajda

jo meve kī shāḳheñ kamāñ ho ga.ī haiñ

vo but qat.a kartā hai zulfoñ ko shāyad

nazākat par us kī girāñ ho ga.ī haiñ

Tuk ai bāġhbāñ rahm kar bulbuloñ par

ḳhizāñ meñ ye be-āshiyāñ ho ga.ī haiñ

maiñ royā huuñ yaañ tak judā.ī meñ terī

ki āñkheñ mirī nāvdāñ ho ga.ī haiñ

judā.ī meñ us zulf kī misl-e-shāna

mirī uñgliyāñ ustuḳhvāñ ho ga.ī haiñ

ruḳh us kā maiñ ai 'mus.hafī' kyuuñ ki dekhūñ

nigāheñ mirī bad-gumāñ ho ga.ī haiñ

tamashe ki shaklen ayan ho gai hain

bahaaren bahut yan KHizan ho gai hain

KHabar pas-rawon se tum un ki na puchho

jo ruhen adam ko rawan ho gai hain

nikali hain jo hum ne auj-e-suKHan se

zaminen wo sab aasman ho gai hain

unhen farz hai tir ka kis ke sajda

jo mewe ki shaKHen kaman ho gai hain

wo but qata karta hai zulfon ko shayad

nazakat par us ki giran ho gai hain

Tuk ai baghban rahm kar bulbulon par

KHizan mein ye be-ashiyan ho gai hain

main roya hun yan tak judai mein teri

ki aankhen meri nawdan ho gai hain

judai mein us zulf ki misl-e-shana

meri ungliyan ustuKHwan ho gai hain

ruKH us ka main ai 'mushafi' kyun ki dekhun

nigahen meri bad-guman ho gai hain