tamannā hai kisī kī teġh ho aur apnī gardan ho
phir us ke ba.ad yārab sar kaTe naale meñ madfan ho
hujūm-e-ām ho aur mujtam.a goroñ kī palTan ho
samajh lo lauT aa.e haiñ jo station pe dan dan ho
kaheñ qātil ko ham mahbūb agar hai ain nādānī
hazar lāzim hai aise shaḳhs se jo apnā dushman ho
lab-e-shīrīñ agar ma.ashūq kā qand-e-mukarrar hai
jabhī jāneñ ki baiTheñ makkhiyāñ aur us pe bhan bhan ho
na turbat kī jagah kūche meñ paa.ī to shikāyat kyā
galī un kī koī takiya hai jis meñ apnā madfan ho
ye sab lakḌī ke taḳhte ḳhaak meñ mil jaa.eñ jal-bhun kar
ġhazab ho jaa.e gar sach-much lahad meñ daaġh raushan ho
yahī dahshat agar dast-e-junūñ kī hai to ai bhaa.ī
dupaTTa oḌh lo jis meñ garebāñ ho na dāman ho
nigāh-e-shauq kyā Thahrī vo goyā belcha Thahrī
makān-e-yār kī dīvār meñ jis se ki rauzan ho
machā.e shor-o-ġhul āh-e-sharar-afshāñ kare har-dam
yahī ausāf lāzim hai to āshiq kyuuñ ho engine ho
hamārā jhonjh phulvārī meñ ho koī nahīñ kahtā
yahī kahte haiñ yārab baaġh meñ apnā nasheman ho
azal se tā-abad lambī yaqīñ hai Taañg bhī hogī
hasīn shoḳh vo sahrā-e-mahshar jis kā dāman ho
'zarīf' insāf se kah do vo āshiq hai ki chuhā hai
zamīn-e-qasr-e-jānāñ meñ jo ye chāhe ki maskan ho
tamanna hai kisi ki tegh ho aur apni gardan ho
phir us ke baad yarab sar kaTe nale mein madfan ho
hujum-e-am ho aur mujtama goron ki palTan ho
samajh lo lauT aae hain jo station pe dan dan ho
kahen qatil ko hum mahbub agar hai ain nadani
hazar lazim hai aise shaKHs se jo apna dushman ho
lab-e-shirin agar mashuq ka qand-e-mukarrar hai
jabhi jaanen ki baiThen makkhiyan aur us pe bhan bhan ho
na turbat ki jagah kuche mein pai to shikayat kya
gali un ki koi takiya hai jis mein apna madfan ho
ye sab lakDi ke taKHte KHak mein mil jaen jal-bhun kar
ghazab ho jae gar sach-much lahad mein dagh raushan ho
yahi dahshat agar dast-e-junun ki hai to ai bhai
dupaTTa oDh lo jis mein gareban ho na daman ho
nigah-e-shauq kya Thahri wo goya belcha Thahri
makan-e-yar ki diwar mein jis se ki rauzan ho
machae shor-o-ghul aah-e-sharar-afshan kare har-dam
yahi ausaf lazim hai to aashiq kyun ho engine ho
hamara jhonjh phulwari mein ho koi nahin kahta
yahi kahte hain yarab bagh mein apna nasheman ho
azal se ta-abad lambi yaqin hai Tang bhi hogi
hasin shoKH wo sahra-e-mahshar jis ka daman ho
'zarif' insaf se kah do wo aashiq hai ki chuha hai
zamin-e-qasr-e-jaanan mein jo ye chahe ki maskan ho
Source:
Intikhabe Kalam Zareef (Pg. E-35 B-36)
-
- Edition: 2004
- Publisher: Mohammad Najmul Hasan
- Year of Publication: 2004
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.