tan-e-be-jaan mein ab raha kya hai

tan-e-be-jāñ meñ ab rahā kyā hai

dekhiye marzi-e-ḳhudā kyā hai

apnī hālat pe aaj rotā hai

dil-e-dīvāna ko huā kyā hai

ai tabībo tumheñ ḳhudā kī qasam

sach batā do ki mājrā kyā hai

maiñ ḳhatāvār hī sahī lekin

sun to lo pahle mājrā kyā hai

na khulā aaj tak kisī par bhī

ḳhat-e-taqdīr meñ likhā kyā hai

kyuuñ ye chup chup ga.e adam vaale

yā-ilāhī ye mājrā kyā hai

lab-e-zaḳhm-e-jigar to hañste haiñ

tū ne ai baḳhiya-gar siyā kyā hai

dil to kyā jaan ishq meñ de dī

ye na pūchhā ki mudda.ā kyā hai

uTh ke pichhle se aahoñ kā bharnā

'shauq' terā ye mashġhala kyā hai

tan-e-be-jaan mein ab raha kya hai

dekhiye marzi-e-KHuda kya hai

apni haalat pe aaj rota hai

dil-e-diwana ko hua kya hai

ai tabibo tumhein KHuda ki qasam

sach bata do ki majra kya hai

main KHatawar hi sahi lekin

sun to lo pahle majra kya hai

na khula aaj tak kisi par bhi

KHat-e-taqdir mein likha kya hai

kyun ye chup chup gae adam wale

ya-ilahi ye majra kya hai

lab-e-zaKHm-e-jigar to hanste hain

tu ne ai baKHiya-gar siya kya hai

dil to kya jaan ishq mein de di

ye na puchha ki muddaa kya hai

uTh ke pichhle se aahon ka bharna

'shauq' tera ye mashghala kya hai