tang naddi ke taDapte hue pani ki tarah

tañg naddī ke taḌapte hue paanī kī tarah

ham ne Daalī hai na.ī ek ravānī kī tarah

Dhalte Dhalte bhī ġhazab Dhaa.e gayā hijr kā din

kisī kāfir kī junūñ-ḳhez javānī kī tarah

aisī vahshat kā burā ho ki ham apne ghar se

ġham hue ḳhud bhī mohabbat kī nishānī kī tarah

nañge sach qābil-e-bardāsht kahāñ hote haiñ

vāqi.a kahiye to kahiyegā kahānī kī tarah

paas rakkheñ to malāl aag lagā.eñ to malāl

dil bhī hai kyā kisī tasvīr purānī kī tarah

ishq hai madrasa-e-zīst kī ukhḌī huī iiñT

hama-dānī kī tarah hech-mudānī kī tarah

ye ġhazal hazrat-e-'rāhīl' kī hai dhyān rahe

aap poshīda haiñ lafzoñ meñ ma.ānī kī tarah

tang naddi ke taDapte hue pani ki tarah

hum ne Dali hai nai ek rawani ki tarah

Dhalte Dhalte bhi ghazab Dhae gaya hijr ka din

kisi kafir ki junun-KHez jawani ki tarah

aisi wahshat ka bura ho ki hum apne ghar se

gham hue KHud bhi mohabbat ki nishani ki tarah

nange sach qabil-e-bardasht kahan hote hain

waqia kahiye to kahiyega kahani ki tarah

pas rakkhen to malal aag lagaen to malal

dil bhi hai kya kisi taswir purani ki tarah

ishq hai madrasa-e-zist ki ukhDi hui inT

hama-dani ki tarah hech-mudani ki tarah

ye ghazal hazrat-e-'rahil' ki hai dhyan rahe

aap poshida hain lafzon mein maani ki tarah