tanqid karo KHub magar dekhte rahna

tanqīd karo ḳhuub magar dekhte rahnā

be-kār na jā.egā hunar dekhte rahnā

ham biich samundar se guhar le ke haiñ aa.e

tum baiTh ke sāhil pe lahar dekhte rahnā

aa.ī na kabhī lauT ke phir fasl-e-bahārāñ

be-sūd gayā merā Dagar dekhte rahnā

tum shor machāo ki jalā do ye badan bhī

hogā na kabhī un pe asar dekhte rahnā

jis samt chalā nuur usī samt añdherā

tā-hashr rahegā ye safar dekhte rahnā

nafrat ke añdheroñ ko mohabbat ne harāyā

aḳhbār meñ aa.egī ḳhabar dekhte rahnā

'sābir' ko bhalā kaun yahāñ jaan rahā hai

jo hai vo na aa.egā nazar dekhte rahnā

tanqid karo KHub magar dekhte rahna

be-kar na jaega hunar dekhte rahna

hum bich samundar se guhar le ke hain aae

tum baiTh ke sahil pe lahar dekhte rahna

aai na kabhi lauT ke phir fasl-e-bahaaran

be-sud gaya mera Dagar dekhte rahna

tum shor machao ki jala do ye badan bhi

hoga na kabhi un pe asar dekhte rahna

jis samt chala nur usi samt andhera

ta-hashr rahega ye safar dekhte rahna

nafrat ke andheron ko mohabbat ne haraya

aKHbar mein aaegi KHabar dekhte rahna

'sabir' ko bhala kaun yahan jaan raha hai

jo hai wo na aaega nazar dekhte rahna