tanur-e-waqt ki hiddat se Dar gae hum bhi

tanūr-e-vaqt kī hiddat se Dar ga.e ham bhī

magar tapish meñ tape to nikhar ga.e ham bhī

jahāñ pahuñch ke musāfir ke ruḳh badalte haiñ

rah-e-hayāt ke us moḌ par ga.e ham bhī

jalā diyā thā safīna utar ke sāhil par

junūn-e-fat.h meñ kyā kyā na kar ga.e ham bhī

jadīd rañg se maddham huā na rañg-e-kuhan

qadīm rañg meñ vo rañg bhar ga.e ham bhī

qadam qadam pe sitam sah ke jī rahe the jise

usī hayāt kī bāñhoñ meñ mar ga.e ham bhī

na kuchh junūn-e-tajassus kā pūchhiye aalam

kahāñ kahāñ se na 'kausar' guzar ga.e ham bhī

tanur-e-waqt ki hiddat se Dar gae hum bhi

magar tapish mein tape to nikhar gae hum bhi

jahan pahunch ke musafir ke ruKH badalte hain

rah-e-hayat ke us moD par gae hum bhi

jala diya tha safina utar ke sahil par

junun-e-fath mein kya kya na kar gae hum bhi

jadid rang se maddham hua na rang-e-kuhan

qadim rang mein wo rang bhar gae hum bhi

qadam qadam pe sitam sah ke ji rahe the jise

usi hayat ki banhon mein mar gae hum bhi

na kuchh junun-e-tajassus ka puchhiye aalam

kahan kahan se na 'kausar' guzar gae hum bhi