tanz karna to unki aadat hai

tanz karnā to un kī aadat hai

aaj kuchh aur hī sharārat hai

ġhair se hañs ke aap milte haiñ

aisī bhī ham se kyā adāvat hai

mujh se ḳhvāboñ meñ milte rahte haiñ

mujh par un kī baḌī ināyat hai

jab bhī fursat ho aa ke le lenā

merā dil aap kī amānat hai

un ke ghar kā tavāf kartā huuñ

ye mere vāste ziyārat hai

kyā kahūñ apnā hāl-e-dil jānāñ

haal merā ḳhud hī vazāhat hai

mere lahje meñ inkisārī hai

mere purkhoñ kī ye virāsat hai

sang-e-marmar meñ dil dhaḌaktā hai

taaj kahne ko ek imārat hai

rote bachche ko gar hañsāo tum

ye bhī ik tarah kī ibādat hai

kal talak jo the rāhzan mash.hūr

āj-kal un kī hī vazārat hai

tujh ko 'sāgar' pata nahīñ shāyad

shā.erī ishq kī alāmat hai

tanz karna to un ki aadat hai

aaj kuchh aur hi shararat hai

ghair se hans ke aap milte hain

aisi bhi hum se kya adawat hai

mujh se KHwabon mein milte rahte hain

mujh par un ki baDi inayat hai

jab bhi fursat ho aa ke le lena

mera dil aap ki amanat hai

un ke ghar ka tawaf karta hun

ye mere waste ziyarat hai

kya kahun apna haal-e-dil jaanan

haal mera KHud hi wazahat hai

mere lahje mein inkisari hai

mere purkhon ki ye wirasat hai

sang-e-marmar mein dil dhaDakta hai

taj kahne ko ek imarat hai

rote bachche ko gar hansao tum

ye bhi ek tarah ki ibaadat hai

kal talak jo the rahzan mashhur

aaj-kal un ki hi wazarat hai

tujh ko 'sagar' pata nahin shayad

shaeri ishq ki alamat hai