tapte sahra mein kahin koi shajar aata hai

tapte sahrā meñ kahīñ koī shajar aatā hai

dard par tark-e-sukūnat kā asar aatā hai

sadma-e-hijr se mahfūz rakhūñgā tujh ko

mujh ko qistoñ meñ bichhaḌne kā hunar aatā hai

din guzar jaatā hai ta.abīr kī hasrat le kar

raat hotī hai to phir ḳhvāb utar aatā hai

jab se jaane haiñ mohabbat ke favā.ed ham ne

ek hī shaḳhs ka.ī baar nazar aatā hai

dard-e-furqat meñ tirī āñkheñ faqat giilī huiiñ

merī āñkhoñ meñ miyāñ laal color aatā hai

hijr kī shab mire pahlū meñ rahā terī tarah

vo sitāra jo bahut duur nazar aatā hai

koī āvārgī-e-shahr se bach hī na sakā

ab parinda bhī kahāñ shaam ko ghar aatā hai

mujh ko chamkā ga.ī 'āfāq' baḌoñ kī sohbat

jaise qatre pe samundar kā asar aatā hai

tapte sahra mein kahin koi shajar aata hai

dard par tark-e-sukunat ka asar aata hai

sadma-e-hijr se mahfuz rakhunga tujh ko

mujh ko qiston mein bichhaDne ka hunar aata hai

din guzar jata hai tabir ki hasrat le kar

raat hoti hai to phir KHwab utar aata hai

jab se jaane hain mohabbat ke fawaed hum ne

ek hi shaKHs kai bar nazar aata hai

dard-e-furqat mein teri aankhen faqat gili huin

meri aankhon mein miyan lal color aata hai

hijr ki shab mere pahlu mein raha teri tarah

wo sitara jo bahut dur nazar aata hai

koi aawargi-e-shahr se bach hi na saka

ab parinda bhi kahan sham ko ghar aata hai

mujh ko chamka gai 'afaq' baDon ki sohbat

jaise qatre pe samundar ka asar aata hai