taqaze hain shayad yahi aaj-kal ke

taqāze haiñ shāyad yahī āj-kal ke

bahāroñ meñ rakh deñ guloñ ko masal ke

mirī talḳh thī muskurāhaT kuchh aisī

ġham-e-zindagī rah gayā haath mal ke

hameñ kyā Darāte ho miTne ke Dar se

zamāna na rakh de tumheñ ḳhud kuchal ke

fazā meñ ye dhīmī sī aahaT hai kaisī

sabā hai ki un ke qadam halke halke

ye dil hai shikasta umīdoñ kī bastī

yahāñ ā.iyegā sambhal ke sambhal ke

ajab hai ye duniyā ajab us kī rasmeñ

kahīñ par ujāle kahīñ par dhundalke

na kī maiñ ne taqlīd-e-shaiḳh-o-barahman

ḳhudā mil gayā is bhañvar se nikal ke

sunā hai bahisht-e-zamīñ mai-kada hai

chalo 'tāhira' dekh leñ kyoñ na chal ke

taqaze hain shayad yahi aaj-kal ke

bahaaron mein rakh den gulon ko masal ke

meri talKH thi muskurahaT kuchh aisi

gham-e-zindagi rah gaya hath mal ke

hamein kya Daraate ho miTne ke Dar se

zamana na rakh de tumhein KHud kuchal ke

faza mein ye dhimi si aahaT hai kaisi

saba hai ki un ke qadam halke halke

ye dil hai shikasta umidon ki basti

yahan aaiyega sambhal ke sambhal ke

ajab hai ye duniya ajab us ki rasmen

kahin par ujale kahin par dhundalke

na ki main ne taqlid-e-shaiKH-o-barahman

KHuda mil gaya is bhanwar se nikal ke

suna hai bahisht-e-zamin mai-kada hai

chalo 'tahira' dekh len kyon na chal ke