taras raha hun adam aarmida KHushbu ko

taras rahā huuñ adam ārmīda ḳhushbū ko

kahāñ se DhūñD ke lā.ūñ ramīda aahū ko

zahe-nasīb ki taskīn de rahā hai aaj

tumhārā husn mire ishq-e-sar-ba-zānū ko

chamak rahā hai tirī raah meñ tirī ḳhātir

hai intizār tirā har diye ko jugnū ko

sitam ki ahl-e-mohabbat bhī rah ga.e nākām

samajh na paa.e jamāl-e-hazār-pahlū ko

utārā umr-e-gurezāñ ke raste jogī ne

hamāre sar se ka.ī joginoñ ke jaadū ko

hazār hiile bahāne se 'krishn-mohan' ne

shikār-e-shauq kiyā hai nigār-e-dil-jū ko

taras raha hun adam aarmida KHushbu ko

kahan se DhunD ke laun ramida aahu ko

zahe-nasib ki taskin de raha hai aaj

tumhaara husn mere ishq-e-sar-ba-zanu ko

chamak raha hai teri rah mein teri KHatir

hai intizar tera har diye ko jugnu ko

sitam ki ahl-e-mohabbat bhi rah gae nakaam

samajh na pae jamal-e-hazar-pahlu ko

utara umr-e-gurezan ke raste jogi ne

hamare sar se kai joginon ke jadu ko

hazar hile bahane se 'krishn-mohan' ne

shikar-e-shauq kiya hai nigar-e-dil-ju ko