tarh-e-kashan jise hijran-e-yar kahte hain

tarh-e-kashāñ jise hijrān-e-yār kahte haiñ

ham us ko vasl hamesha bahār kahte haiñ

ravā-ravī meñ jo ḳhāka sā khiñch gayā thā kabhī

use bhī motaqidāñ shāh-kār kahte haiñ

vo mohmalāt se nukte nikāl saktā hai

ise fatānat-e-anqā shikār kahte haiñ

nahīñ haiñ san.at-e-zul-vaj.hatain ke qaa.el

ki harf-e-haq ho to ham āshkār kahte haiñ

bahār naam hai tahzīb-e-mausam-e-dil kā

avaam mausam-e-gul ko bahār kahte haiñ

unhīñ se pūchh ki ye isti.āra kis se hai

nafas ko jo nafs-e-musta.ār kahte haiñ

vafā na kar to hamārī vafā kī daad hī de

tire firāq ko ham intizār kahte haiñ

yahīñ talak jo mire saath aa ke lauT ga.e

vo sañg-e-mīl ko sañg-e-mazār kahte haiñ

kinār-e-yār vahāñ se bas ik shalañg pe hai

vo jis ko kaj-kulahāñ auj-dār kahte haiñ

tarh-e-kashan jise hijran-e-yar kahte hain

hum us ko wasl hamesha bahaar kahte hain

rawa-rawi mein jo KHaka sa khinch gaya tha kabhi

use bhi motaqidan shah-kar kahte hain

wo mohmalat se nukte nikal sakta hai

ise fatanat-e-anqa shikar kahte hain

nahin hain sanat-e-zul-wajhatain ke qael

ki harf-e-haq ho to hum aashkar kahte hain

bahaar nam hai tahzib-e-mausam-e-dil ka

awam mausam-e-gul ko bahaar kahte hain

unhin se puchh ki ye istiara kis se hai

nafas ko jo nafs-e-mustaar kahte hain

wafa na kar to hamari wafa ki dad hi de

tere firaq ko hum intizar kahte hain

yahin talak jo mere sath aa ke lauT gae

wo sang-e-mil ko sang-e-mazar kahte hain

kinar-e-yar wahan se bas ek shalang pe hai

wo jis ko kaj-kulahan auj-dar kahte hain