tari sukhe hue honTon pe aa jaane se kya hoga

tarī sūkhe hue hoñToñ pe aa jaane se kyā hogā

bahut tarse haiñ saaqī ek paimāne se kyā hogā

jo āñkheñ dekhtī rahtī haiñ jhuTlāne se kyā hogā

nazar taḌpā rahī hai dil ko bahlāne se kyā hogā

nasheman kī binā rakkhī hai kuchh to soch kar ham ne

chamā-cham bijliyāñ har-sū chamak jaane se kyā hogā

mohabbat ne kahā tayyār kar ke pahlā dīvāna

abhī lākhoñ baneñge ek dīvāne se kyā hogā

hazāroñ inqalāb-e-dard haiñ karvaT se karvaT tak

taḌapte hī raho pahlū badal jaane se kyā hogā

'razā' dekho jo tum un kī taraf se dil meñ kahte the

tabī.at meñ zarā sā inqalāb aane se kyā hogā

tari sukhe hue honTon pe aa jaane se kya hoga

bahut tarse hain saqi ek paimane se kya hoga

jo aankhen dekhti rahti hain jhuTlane se kya hoga

nazar taDpa rahi hai dil ko bahlane se kya hoga

nasheman ki bina rakkhi hai kuchh to soch kar hum ne

chama-cham bijliyan har-su chamak jaane se kya hoga

mohabbat ne kaha tayyar kar ke pahla diwana

abhi lakhon banenge ek diwane se kya hoga

hazaron inqalab-e-dard hain karwaT se karwaT tak

taDapte hi raho pahlu badal jaane se kya hoga

'raza' dekho jo tum un ki taraf se dil mein kahte the

tabiat mein zara sa inqalab aane se kya hoga