tujhko is tarah kahan chhoD ke jaana tha mujhe

tujh ko is tarah kahāñ chhoḌ ke jaanā thā mujhe

vo to ik 'ahd thā aur 'ahd nibhānā thā mujhe

tum to us paar khaḌe the tumheñ mā'lūm kahāñ

kaise dariyā ke bhañvar kaaT ke aanā thā mujhe

to ne to maar diyā mujh ko mire jādū-gara!

is tamāshe meñ to bas mar ke dikhānā thā mujhe

ab ye lagtā hai kahīñ aur hī jā niklā huuñ

mujh ko ḳhud hī se kahīñ DhūñDh ke laanā thā mujhe

tū ne kyā soch ke dikhne ko bhī nā dikhnā kiyā

maiñ to jaisā nazar aayā nazar aanā thā mujhe

tujh ko le aayā thā manzil pe zamāna lekin

maiñ chalā hī thā ki dar-pesh zamāna thā mujhe

vo jo ik baar uThā laayā thā maiñ 'ujlat meñ

phir vahī baar har ik baar uThānā thā mujhe

vo to aisā hai ki mohlat na milī thī varna

apnī barbādī pe ḳhud jashn manānā thā mujhe

mujh ko jaanā thā kahīñ aur kahīñ aur kahīñ

terī duniyā to faqat ek Thikānā thā mujhe

tujh ko is tarah kahan chhoD ke jaana tha mujhe

wo to ek 'ahd tha aur 'ahd nibhana tha mujhe

tum to us par khaDe the tumhein ma'lum kahan

kaise dariya ke bhanwar kaT ke aana tha mujhe

to ne to mar diya mujh ko mere jadu-gara!

is tamashe mein to bas mar ke dikhana tha mujhe

ab ye lagta hai kahin aur hi ja nikla hun

mujh ko KHud hi se kahin DhunDh ke lana tha mujhe

tu ne kya soch ke dikhne ko bhi na dikhna kiya

main to jaisa nazar aaya nazar aana tha mujhe

tujh ko le aaya tha manzil pe zamana lekin

main chala hi tha ki dar-pesh zamana tha mujhe

wo jo ek bar uTha laya tha main 'ujlat mein

phir wahi bar har ek bar uThana tha mujhe

wo to aisa hai ki mohlat na mili thi warna

apni barbaadi pe KHud jashn manana tha mujhe

mujh ko jaana tha kahin aur kahin aur kahin

teri duniya to faqat ek Thikana tha mujhe