meri nigah kisi zawiye pe Thahre bhi

mirī nigāh kisī zāviye pe Thahre bhī

maiñ dekh saktā huuñ had-e-nazar se aage bhī

ye rāsta mire apne nishāñ se aayā hai

mire hī naqsh-e-kaf-e-pā the mujh se pahle bhī

maiñ us kī aañkh ke manzar meñ aa to saktā huuñ

vo kam-nigāh mujhe hāshiye meñ rakkhe bhī

mire kahe pe mujhe chaak par to rakhtā hai

magar ye chaak se kahtā nahīñ ki ghūme bhī

maiñ us ke husn kī thoḌī sī dhuup le aayā

vo āftāb to Dhalne lagā thā vaise bhī

abhī to mansab-e-hastī se maiñ haTā hī nahīñ

badal ga.e haiñ mire dostoñ ke lahje bhī

paḌī huī hai ye poshāk-e-ḳhāk muddat se

kabhī badan se kahūñgā ki is ko pahne bhī

na.e zamāne meñ rahnā aur itnī sāda-dilī

mirā mazāq uḌāte haiñ ab to bachche bhī

maiñ ek shīsha-e-sāda huuñ aur mayassar huuñ

kisī kī aañkh mire ār-pār dekhe bhī

meri nigah kisi zawiye pe Thahre bhi

main dekh sakta hun had-e-nazar se aage bhi

ye rasta mere apne nishan se aaya hai

mere hi naqsh-e-kaf-e-pa the mujh se pahle bhi

main us ki aankh ke manzar mein aa to sakta hun

wo kam-nigah mujhe hashiye mein rakkhe bhi

mere kahe pe mujhe chaak par to rakhta hai

magar ye chaak se kahta nahin ki ghume bhi

main us ke husn ki thoDi si dhup le aaya

wo aaftab to Dhalne laga tha waise bhi

abhi to mansab-e-hasti se main haTa hi nahin

badal gae hain mere doston ke lahje bhi

paDi hui hai ye poshak-e-KHak muddat se

kabhi badan se kahunga ki is ko pahne bhi

nae zamane mein rahna aur itni sada-dili

mera mazaq uDate hain ab to bachche bhi

main ek shisha-e-sada hun aur mayassar hun

kisi ki aankh mere aar-par dekhe bhi